05 მაისს საქართველოს პარლამენტის თავმჯდომარე დავით ბაქრაძე რეგიონის გუბერნატორ დავით გაგოშიძესთან, პარლამენტში ამბროლაურის და ონის მაჟორიტარ დეპუტატებთან და ადგილობრივი ხელისუფლების წარმომადგენლებთან ერთად ონის მუნიციპალიტეტის სოფელ სორის მოსახლეობას შეხვდა და მათ საქართველოს ხელისუფლების მიერ 2012 წელს დაგეგმილ სოციალურ და ინფრასტრუქტურულ პროექტებზე ესაუბრა.
რეგიონში უკვე დაწყებულია საგაზაფხულო სახნავ-სათესი სამუშაოები, რისთვისაც მობილიზებულია საჭირო ტექნიკა. ვაუჩერების ხარჯზე, ტრაქტორების გამოყენებით მოსახლეობას საშუალება აქვს საგაზაფხულო სამუშოები ორგანიზებულად ჩაატაროს ძალიან დაბალ ფასში, ეს კი მათთვის დიდი შეღავათია. ,,ჩვენი ამოცანაა, რომ ასეთი გზით და სხვა საშუალებებით დავეხმაროთ ყველა სოფელს, ყველა გლეხს, რომ მოსახლეობას საშუალება ქონდეს დაამუშაოს მიწა, მოიყვანოს მოსავალი, დარჩეს მეტი შემოსავალი და დასაქმდეს უფრო მეტი ადამიანი. ამ გზით ვეხმარებით ჩვენს სოფელს, ჩვენს გლეხებს ფეხზე დადგომასა და ეკონომიკურად გაძლიერებაში", - განაცხადა დავით ბაქრაძემ.
მ/წ 11-13 მაისს ქ. ამბროლაურში გაიმართა საქველმოქმედო ორგანიზაცია ,,საშობაო ნაძვის ხის ფონდის” მიერ ორგანიზებული აქცია, რომელიც ითვალისწინებდა მოსწავლეთა სამედიცინო პროფილაქტიკურ-დიაგნოსტიკურ გამოკვლევებს უფასოდ. ბავშვებს საშუალება ჰქონდათ გასაუბრებოდნენ პედიატრებს, ოფთალმოლოგებს, სტომატოლოგებს. პატარებს დაურიგდათ სხვადასხვა სახის საჩუქრებიც.
